 |
| كن جاهز للمقابلات الشخضية interview tips |
- اولا ال (CV)هو عنوانك ,يعنى لما تقدم سى فى ماينفعش يكون فيه اخطاء املائية (صدقنى بنشوفها كتير) ياريت تراجعه مرة واتنين وتديه لحد غيرك يراجعه عشان يلاحظ اللى انت مش ملاحظه
- ايميلك فى السى فى مش مهم خصوصا فى مصر لكن لو ناوى تكتبه يبقى ماينفعش يكون lovely او mido او الحاجات دى ,وماينفعش يكون فيه ارقام كتييييييير جدا زى مثلا Ali11111
- اهم حاجة صاحب العمل بيبص ليها لما تقدم اولا المؤهلات والكورسات ثانيا الخبرة يعنى دول اول حاجتين يتكتبوا بعد بيانات الاتصال ,الحالة الاجتماعية وكده خليها تحت
- المظهر بيفرق ,يعنى الكاجوال غالبا مابيبقاش محبذ والبدلة لو مش Fit عليك بلاشها ,قميص وبنطلون وجزمة ملمعة كفاية جدا ,ممكن تلبس كاجوال فى حالة واحدة لو انت ماقدمتش فى الشركة وهم بحثوا عنك واتصلوا بيك (عارفينك يعنى وطالبينك بالاسم )
- مظهر البنت بيفرق برده ,يعنى المكياج الاوفر والبنطلونات الاوفر والبرفان الاوفر بيدى انطباع مش كويس وعموما البرفان والميك اب اصلا حرام فى الشارع
- لما تروح وتقعد فى الانتظار مافيهاش مشكلة انك تطلع المنديل وتمسح العرق (ان وجد ) وماتحسش انك متكتف عادى وعادى انك تسأل على الحمام (بس يستحسن تكون مرتاح قبل ماتروح )
- ماتوريش لصاحب العمل انك ملهوف اوى على الوظيفة وفى نفس الوقت ماتبينش انك مش فارقة معاك
- لو طلبوا منك الانتظار لمدة طويلة معلش اعصر على نفسك لمونة غالبا الناس مش بتبقى فاضية وممكن اى ظرف طارىء يشغل المدير
- لو اتأخرت عن ميعاد الانترفيو اكتر من ربع ساعة يبقى نصيحة ماترحش ولو ناوى تتأخر بسبب مشكلة فى المواصلات او نحوه يفضل تتصل تعتذر انك هتتأخر
- اوعى تقول لصاحب الشركة انك على استعداد انك تشتغل ببلاش تحت التدريب ده بيدى انطباعين وحشين اولهم انك مش كفؤ للوظيفة والتانى ان صاحب العمل لو وافق هيحس انه بيستغلك فهو مش هيعمل كده
- لو قاعد على ترابيزة اجتماعات ياريت ماتحطش ايديك تحت الترابيزة افرد ظهرك وياريت لو تحط ايدك فوق الترابيزة وماسك قبضة ايدك الشمال بايدك اليمين ده بيدى انطباع بالثقة
